Во пресрет на прогнозираната тешка зима во време на најголемата економска и енергетска криза по Втората светска војна, започнуваат мерките за штедење на електрична енергија во државните институции.

Со мерките, кои ќе важат до 31 март наредната година, потрошувачката на струја во институциите ќе се намали за 15 отсто, со што се очекува заштеда на електрична енергија од 19,5 милиони киловат-часа за шест месеци.

Мерките предвидуваат исклучување на декоративното осветлување на фасадите, уредите за ладење да се постават не пониско од 27 степени, а за греење не повеќе од 20 степени. Светлата и компјутерите задолжително ќе се исклучуваат по завршување на работата, осветлувањето на јавните патишта ќе се намали до минимален сигурносен обем.

Во време на криза неопходно е одговорно однесување и рационално трошење на струјата.

Владата предводена од СДСМ со навремени и ефикасни политики ја одржува стабилноста на енергетскиот сектор, максимално го зголеми производството на електрична енергија и силно ја субвенционира цената на струјата за граѓаните.

Домаќинствата за сметките за струја плаќаат 20 отсто, а 80 отсто од цената се субвенционира од страна на државата.

Се подготвуваат и нови антикризни мерки. Со ребалансот на Буџетот веќе се обезбедени 76 милиони евра за антикризни мерки кои како пакет се подготвуваат за четвртиот квартал оваа година.

Извор: МИА