Центарот за иднината на демократијата на Универзитетот во Кембриџ го анализира мислењето на јавноста за демократијата од 1995 година. Неговиот последен извештај опфаќа 154 земји и открива дека нивото на незадоволство од демократијата е највисоко досега.

- Откривме дека незадоволството од демократијата се зголемило со текот на времето и достигнува рекордно високо ниво, особено во развиените земји - пишува Роберто Фоа, автор на извештајот.

Во средината на 90-тите години жителите на Европа, Африка, Блискиот Исток, Азија и Австралија биле релативно задоволни од нивните демократски земји. Оттогаш процентот на жители што не се задоволни од демократијата во нивната земја пораснал од 47,9% на 57,5%.


Жителите на дел од најголемите демократски држави, како САД и Бразил, изразуваат најголемо ниво на незадоволство. Мексико, Австралија и Велика Британија го забележуваат највисокото ниво на незадоволство досега. Јапонија, Грција и Шпанија се приближуваат до своите рекорди.

Сепак, жителите на некои земји, како Данска, Швајцарија и Норвешка, покажуваат доверба во нивните демократски институции. Ова се земјите што опфаќаат само 2% од светското население, а во кои помалку од една четвртина од жителите не се задоволни од демократијата во земјата.


Извештајот покажува пораст во нивото на незадоволство, но не ја наведува причината. Меѓутоа, податоци од последните 25 години покажуваат врска меѓу нивото на незадоволство и големите настани, како економски шокови и политички скандали. Настаните што доведоа до рекордите во незадоволството од демократијата ги вклучуваат и почетокот на мигрантската криза во Европа, Брегзит и изборот на Доналд Трамп за претседател на САД и на Жаир Болсонару за претседател на Бразил.

Автор: Дерен Такери
Извор: Weforum.org