Последната анкета на Евробарометар покажува дека за 94 отсто од европските граѓани, заштитата на климата претставува приоритет, 91 отсто сметаат дека климатските промени се „сериозен проблем“.

Европската комисија утре треба да го обелодени предлог-законодавството за климата познат како „Закон за климата“.

Резултатите од анкетата на јавното мислење во ЕУ покажуваат дека граѓаните бараат од европските и националните власти да сторат повеќе за заштита на животната средина .

Климатските промени се најважниот аспект од животната средина за 53 отсто од испитаниците, а 46 отсто одговориле дека тоа е загадувањето.

Околу 80 отсто од граѓаните на ЕУ сметаат дека одговорноста, пред сѐ, лежи кај големите компании и индустријата кои не прават доволно да ги спречат климатските промени, додека 67 отсто сметаат дека граѓаните не се доволно активни на ова поле. 33 отсто сметаат дека треба да го смениме начинот на кој консумираме храна за да ја заштитиме животната средина, а 31 отсто оценуваат дека е потребна промена на начините на производство и трговија.

Над три четвртини изјавиле дека проблемите со животната средина имаат директни последици врз нивниот живот и нивното здравје, додека 89 отсто се загрижени за влијанието на пластиката врз околината.

Што се однесува до мерките што граѓаните ги очекуваат од националните и европските власти, 72 отсто сметаат дека нивните влади не прават доволно за животната средина и климата, а 68 отсто сметаат дека ЕУ не прави доволно.