Како што океаните полека губат вода, првите делови на скриено земјиште што излегуваат се подводните рабови на континентите. Тие вклучуваат некои мостови кои раните луѓе ги поминувале кога мигрирале од континент на континент. Пред десетици илјади години нашите претходници можеле да одат од континентална Европа до Велика Британија, од Сибир до Алјаска и од Австралија до соседните острови.

- Кога се случила последната ледена доба, голема количина океанска вода била замрзната на половите. Затоа постоеле мостовите. Секое такво поврзување им помагало на луѓето да мигрираат и кога ледената доба завршила, водата на некој начин ги заробила - објаснува О'Донахју.

Преку отстранување на таа вода, анимацијата овозможува поглед во светот на нашите антички предци.

Исто така, анимацијата го покажува најдолгиот планински венец, кој се појавува штом нивото на морето се намалува 2 до 3 илјади метри. Станува збор за средноокеанскиот гребен, кој е долг околу 60.000 километри и 90 отсто од него се под вода.

Кога анимираните океани пресушуваат до 6.000 метри под нивото, поголемиот дел од водата го нема. Но, потребни се дополнителни 5.000 метри за да се испразнат најдлабоките делови на Маријанскиот Ров, најдлабокото место на Земјината кора.

- Ми се допаѓа како оваа анимација открива дека океанското дно е еднакво променливо и интересно во геологијата како и континентите - вели О'Донахју.

Тој додава дека празнењето на морињата го открива не само океанското дно, туку и античката приказна на човештвото.