Единствен носител на македонското знаме на отворањето на Зимските олимписки игри во Пекинг ќе биде скијачот Дардан Дехари. Крос-кантри скијачката Ана Цветановска (која на сите ковид-тестови е негативна) поради близок контакт со својот тренер Борче Јованоски (двапати позитивен на ковид-19), нема да може да го носи македонското знаме. Доколку има два последователни негативни тестови, со посебно одобрение, Борче Јованоски ќе може веднаш од специјализираниот ковид-хотел да се врати во Олимпиското село во Пекинг.
Дехари ќе се натпреварува во слалом и велеслалом со настапи на 13 и на 16 февруари. Цветановска ќе се натпреварува во крос-кантри скијање во дисциплините 7,5 km слободно, 7,5 km скијатлон и 10 km класично (настап на 5 и 10 февруари), додека трет македонски претставник на ЗОИ ќе биде Ставре Јада во крос-кантри скијање, дисциплини спринт слободно 1,5 km и 50 km слободно (8 и 19 февруари).
Отворањето на Олимпијадата ќе се одржи на Олимпискиот стадион во Пекинг „Птичје гнездо“ во 13:00 ч. по македонско време. „Птичје гнездо“ ќе стане првиот стадион во историјата на кој ќе се одржи церемонија на отворање и на Летните и на Зимските олимписки игри. Парадата на нациите на отворањето на ЗОИ ќе биде според кинеските знаци, а спортистите на Грција ќе бидат првите што ќе влезат на Олимпискиот стадион.