Пет дена доцни објавувањето на списоците за прием на студенти во студентските домови во Скопје. Иако во
конкурсот на Министерството за образование и наука стои дека најдоцна до 31 август ќе бидат објавени резултатите, до денес новите станари во некој од студентските домови при Државниот студентски центар и студентскиот дом „Пелагонија“ чекаат одговори дали се примени.
Од МОН велат дека комисиите сѐ уште работат и дека до крајот на неделата ќе ги објават резултатите.
Ова не е првпат МОН да доцни со објавувањето резултати од некој конкурс. И по еден месец студенти чекаа за резултати за студентските стипендии во февруари годинава.
Студентите реагираат за пропустот на МОН. Се огласи и студентската организација при Правниот факултет.
- Студентите веќе петти ден ги чекаат резултатите за сместување во студентските домови! Иако резултатите требаше да бидат објавени уште на 30 август, а студентите веќе да бидат сместени во домовите, МОН уште нема објавено никаква информација. Студентите веќе требаше да планираат како ќе ја поминат годината и кои испити ќе ги полагаат, наместо тоа, тие се оставени на цедило и во неизвесност за своето домување бидејќи господата во МОН се зафатени со пиење кафиња и гледање турски серии, па немаат време да си ги завршат своите работни обврски.
Вработени во МОН, фатете се за работа! Илјадници студенти чекаат на вас! - објавија тие на својот фејсбук-профил.