Буџетските средства што во минатото беа наменети за финансирање на политичките партии, босанската општина Кључ оваа година ќе ги пренамени за помош на социјално загрозените граѓани.

Ова е првата локална заедница на подрачјето на Унско-санскиот кантон што донела ваква одлука. На редовна седница на тамошниот Општински совет усвојувањето едногласно беше поддржано од сите советници.

Станува збор за 100.000 конвертибилни марки (околу 51.000 евра) и според зборовите на градоначалникот на Кључ, Неџад Зукановиќ, со тие пари ќе се финансираат различни социјални програми.

- Драго ми е што нашите советници ја изгласаа одлуката и покажаа емпатија кон нашите сограѓани кои се во тешка социјална состојба. Ова се тешки времиња и споменатите средства ќе ни дојдат добро за да можеме да им помогнеме на одреден број наши сограѓани - истакна Зукановиќ.

Тој истакна дека оваа локална заедница во текот на годинава се определила за спроведување програми на мерки за штедење и рационализација, поддршка на стопанството и земјоделството и отворање нови работни места. Инаку, буџетот на Кључ за оваа година изнесува помалку од пет милиони марки, што ја става оваа локална заедница во најмалку развиените на подрачјето на Унско-санскиот кантон.

Во последните неколку години Кључ се соочува со сè помасовно заминување на жителите во странство.