Естонскиот парламент на 3 јуни усвои измени и надополнувања на тековните закони за создавање дигитална номадска виза што ќе им овозможи на луѓето да доаѓаат во Естонија како туристи и истовремено да продолжат да работат за странски работодавец или како хонорарци независно од локацијата.
Според естонското министерство за внатрешни работи, Естонија е една од првите земји што ќе создадат ваква дигитална номадска виза.
Дигиталното номадство е начин на живот што им овозможува на луѓето да патуваат низ светот и истовремено да работат од далечина. Естонското министерство за внатрешни работи вели дека главните области каде што работат дигиталните номади се ИКТ, финансии и маркетинг.
- Дигиталната номадска виза ќе го зајакне имиџот на Естонија како е-држава и ќе ѝ помогне да биде повлијателна во глобалната арена. Исто така, ќе помогне во извозот на е-решенија на Естонија, што е особено важно за закрепнување од тековната економска криза - изјави министерот за внатрешни работи на земјата, Март Хелме.
Од министерството соопштуваат дека Естонија е позната по новите технолошки решенија и затоа би била привлечна дестинација за дигиталните номади, кои би внеле разновидност во естонската ИКТ-заедница и би трошеле производи и услуги на земјата, со што позитивно ќе влијаат врз локалните претпријатија.
Фото: Pixabay
Според Хелме, визите за дигитален номад подлежат на општата регулатива за издавање визи и ниту еден дигитален номад нема да добие автоматско право за добивање виза - ќе им биде проверувано потеклото, како и на другите кандидати за визи.
- Бидејќи дигиталните номади не можат да бидат подложени на правилата за класично вработување, ова ги спречува да доаѓаат во Естонија. Во случајот на Естонија, дигиталните номади ги привлекува естонскиот стартап-екосистем, пристапот до пазарот на Европската Унија, високата флуентност на англискиот јазик и програмата за е-престој - изјави министерството за внатрешни работи.
Имплементацијата на програмата за дигитална номадска виза ќе биде постепена. Во првата фаза, на оние странци што можат да докажат дека се дигитални номади ќе им биде дозволено да аплицираат за виза. Земјата, исто така, планира да развие решенија што ќе ги спојат другите е-решенија на
Естонија со дигиталната номадска виза.
Земјата предвидува максимум 1.800 луѓе годишно да аплицираат за дигитална номадска виза.
Дигиталните номади се вид луѓе што користат телекомуникациски технологии за да заработат за живот и, генерално, го водат својот живот на номадски начин. Тие работат далечински од странски земји, кафулиња, јавни библиотеки, места за соработка или рекреативни возила.