По повод Меморијалниот ден „Денот кога се роди добриот човек“, на 10 јули 2022, од 18 часот, на фејсбук-страницата и јутјуб-каналот на Здружението за алтернативна култура „Алтер центар“ Кавадарци, ќе биде промовирана музичка тема посветена на Дејан Костов Лиса, урбан лик и градска легенда, но посветена и на целокупното урбано и градско живеење во Кавадарци, денес своевидно урбано подземје со најубавите вистински градски приказни.
Музичката тема е целосно авторско дело, специјално подготвувана подолг период, искрено и со љубов, со оригинална музика и текст. Ја исполнува група музичари и уметници под името „Лиса“, а е насловена како „Пријатели и другари“.
Здружението за алтернативна култура „Алтер центар“, Кавадарци од 2012 го негува алтернативното културно живеење во градот, се разбира, во рамките на своите скромни можности: десет меморијални манифестации „Денот кога се роди добриот човек“ посветени на Дејан Костов Лиса, урбана градска легенда и соработник на најдобрите уметници од сите области, седум изданија на Меморијалната манифестација „Пријателите за Ристо“, посветена на еден од најголемите кавадаречки и македонски ликовни уметници Ристо Соколов Сокол, рок-концертот „Кога Кавадарци свиреше Rock’N’Roll - 25 години од првиот Тиквеш рок-фест“, „Тиквеш рок-фест“ кој досега доживеа четири изданија и „Алтернативни пејзажи“ - настан за промоција на нови рок-групи, синглови и албуми.