На 15 април Данска ќе ги отвори детските градинки и училиштата за деца од прво до петто одделение ако бројот на смртни случаи и заразени остане стабилен, додека норвешката влада објави дека ширењето на Ковид-19 го стави под контрола.
- Ова донекаде ќе биде како одење по жица. Ако застанеме попат, би можеле да паднеме, а би можело и да се влоши ако одиме пребрзо. Затоа мора да преземаме еден по еден внимателен чекор - изјави данската премиерка Мете Фредериксен.
Таа ги повика Данците да се придржуваат до владините препораки за социјално дистанцирање и хигиена.
Данска е една од првите европски земји што воведоа мерки за ограничување на физичкиот контакт меѓу граѓаните, а досега забележа 187 смртни случаи од Ковид-19.
Фото: Screenshot/YouTube
Во Норвешка ширењето е под контрола
Норвешката влада го стави под контрола ширењето на Ковид-19, објави министерот за здравство Бен Холе, но напомена дека е прерано за укинување на мерките.
Последните податоци покажуваат дека во Норвешка секоја заразена личност го пренесува вирусот на 0,7 други лица, а пред воведувањето на мерките за ограничување на движењето таа бројка била 2,5.
- Тоа значи дека епидемијата на коронавирусот е ставена под контрола - изјави министерот за здравство.
Во Норвешка досега се забележани 5.755 случаи на Ковид-19, а 59 починале.
Земјата воведе строги мерки кон средината на март, ги затвори своите граници за странците, а Норвежаните што се враќаа од странство мораа да одат во 14-дневен карантин.
Училиштата, градинките, црквите, универзитетите и другите установи остануваат затворени.