Баба Ѓурѓа го потсети цел Балкан дека можеме да бидеме обединети откако на „Твитер“ беше раскажана нејзината приказна, пишува српскиот портал „Ноиз“. Оваа жена живее од продажба на цвеќиња, а цело Скопје, Балканот и дијаспората ѝ помагаат секојдневно што побргу да ги распродаде своите букети.
- Бевме кај баба Ѓурѓа, која секој ден продава цвеќиња од својата градина и живее од тоа. Договорот со соседите е кој прв ќе дојде кај неа, да ги купи сите цвеќиња за да не мора да седи на улица на жештините, туку што побрзо да си купи појадок и да си оди дома да одмора - напиша неодамна една твитерџика, која објави и фотографии од букетите што ги прави бабичката.
Меѓу воодушевените луѓе што коментирале има и такви кои се нудат сами да уплатат пари за некој од следните денови, за бабичката да може полесно да си ја заврши работата. Се откри и дека не е првпат луѓе од дијаспората да праќаат пари за најубавите цвеќиња на Балканот.
Секој што патот ќе го однесе во Скопје, знае каде може да најде највреден подарок за себе и за своите најмили бидејќи нема ништо поубаво од солидарноста. Посакуваме приказната на баба Ѓурѓа да продолжи да се шири и да стане попопуларна од секоја цвеќарница во Скопје и пошироко. Ѝ благодариме што на Балканот ја разбуди толку посакуваната и потребна солидарност бидејќи знаевме дека таа постои во нас, но неправедно ја запоставивме, стои на крајот од текстот на српскиот портал.
Насловна фотографија: Twitter