Трансакции во вредност од 100 милиони евра се направени со платежни картички за купување онлајн во првите три квартали од минатата година, или за 28 проценти повеќе на истиот период во 2017 година. Поединечните трансакции во овој период бележат уште поголем тренд на раст, од 39 проценти, покажува истражување на Асоцијацијата за е-трговија на Македонија, објавено денеска.
Најголем дел од направените онлајн-купувања, односно 63 проценти, биле потрошени за купувања од странски е-трговци или речиси 63,34 милиони евра, наспроти 31,15 милион евра остварени кон домашните е-трговци, кои се 33 проценти. Четири проценти или 3,8 милиони евра од вредноста на трансакциите остварени кон домашни е-трговци се направени од иматели на странски платежни картички. Направените онлајн-купувања од имателите на македонски платежни картички кон домашните е-трговци забележуваат раст од 51 процент во однос на истиот период од 2017 година, додека странците во Македонија потрошиле за 82 проценти повеќе онлајн кај домашните е-трговци. Во податоците од НБРМ за остварени онлајн-трансакции се вбројуваат и трансакциите за плаќање сметки за вода, струја, телефон што се реализирани онлајн со платежни картички.
Според истражувањето, онлајн-купувањата кон домашните продавачи се менуваат во позитивен правец за македонските е-продавници. Македонските граѓани трошат просечно по 19,7 евра на една онлајн-трансакција кога купуваат дома, додека 31,5 евро кога купуваат од странски е-трговци. Можеби зголемената онлајн-понуда од домашните е-трговци ќе придонесе за поголема заинтересираност за онлајн-купување од домашните трговци.
- Зголемена и подобра понуда од е-трговците, подобрено искуство и поголеми можности за купувачите се клучни за зголемување на интересот на граѓаните за онлајн-купување. Големите компании, исто така, треба да го стават во фокус овој канал за продажба првенствено заради придобивките што ги овозможува е-трговијата, а со тоа и значајно ќе влијаат и придонесуваат кон раст на е-пазарот - смета Нина Ангеловска, претседател на Асоцијацијата за е-трговија на Македонија.
Главно, според неа, недостигаат едукација и доверба, а таа ја градат најмногу домашните компании со нивните понуди, процеси, поддршка за купувачите и целокупно добро искуство кое ќе ги пресретне и надмине очекувањата на купувачите.
Извор: МИА