Во многу градови патувањето со велосипед е дел од секојдневието на луѓето. Справувањето со често пренатрупаните патишта, сообраќајните опасности и ненадејниот дожд можат да го направат велосипедизмот предизвикувачки.

Но, неодамнешно истражување покажува дека некои градови се подобро приспособени за велосипедистите.

Утрехт во Холандија се најде на врвот на листата од вкупно 90 града од цел свет како најдобро место за велосипедистите, според Индексот за велосипедски градови на технолошкиот стартап „Која“. Повеќе од половина од жителите на градот редовно возат велосипед, поради што имаат ниска стапка на сообраќајни несреќи и релативно мал број кражби на велосипед.

Властите го трансформираат овој холандски град во прибежиште за велосипедисти, инвестирајќи во инфраструктурата за да ги охрабри граѓаните да возат велосипеди. Мрежата од покриени и отворени патеки за велосипеди поврзуваат различни делови од градот, опремени со специјално дизајнирани мостови, подруми и кружни патеки само за велосипедисти. Мрежата ја вклучува и најдолгата велосипедска улица и најголем паркинг за велосипеди, за кој градот вели дека ќе може да смести 33.000 велосипеди до 2020 година.


На листата меѓу првите 10 доминираат европски градови, со исклучок на Хангжу, Кина.

Градовите како Минстер, Германија, кој се најде на второто место, инвестираа во посветената инфраструктура за поттикнување на користењето велосипеди. Инфраструктурата им овозможува на луѓето да возат побезбедно, што резултира со речиси две петтини од градското население редовно да патуваат со велосипед.


Но, постојат исклучоци. Во САД смртните случаи на велосипедисти се зголемиле со зголемувањето на бројот на велосипедисти. Но, извештајот заклучува дека е потребно време и возачите и велосипедистите да се приспособат на користењето велосипед, што може да резултира со краткорочен пораст на несреќи пред да се зголеми свеста.

Градовите што овозможиле одделување на велосипедистите од автомобилите, инвестирајќи во заштитни патеки, се најдобро пласирани.

Додека нивото на безбедност на велосипедистите драматично се разликува меѓу земјите и градовите, истражувањата покажуваат дека јавното здравство има придобивки од охрабрувањето на луѓето да користат велосипеди. Многу повеќе луѓе умираат од хронични болести поврзани со недостиг на физички вежби и слаб квалитет на воздух отколку во сообраќајни несреќи. Редовното возење велосипед ја зголемува кардиоваскуларната кондиција на телото и помага во контролирањето на вишокот телесни масти, што го намалува ризикот од хронични состојби како што се срцеви заболувања, дијабетес 2 и мозочен удар. Возењето велосипед ја гради мускулната сила, помага во флексибилноста на екстремитетите и ослободува ендорфин во телото, кој се бори против стресот.

И не е само здравјето на возачите она што се подобрува кога градот промовира велосипедизам како средство за транспорт. Моќноста на педалите создава нула емисии на јаглерод и ја подобрува животната средина. Обединетите нации предвидуваат дека глобалното население ќе достигне 9,8 милијарди до 2050 година, а 68 отсто од овие луѓе ќе живеат во градовите.

Така што, поттикнувањето на употребата на транспорт без емисии, како велосипедизмот, не само што е добро за нас, туку и за планетата.