Италијанскиот парламент изгласа намалување на бројот на пратеници за повеќе од една третина, како дел од уставните реформи за кои се залагаше движењето „Пет ѕвезди – М5С“, а тоа би можело темелно да ја промени политичката сцена.
Предлог-законот, кој беше одобрен од речиси сите партии, предвидува намалување на бројот на пратеници во Долниот дом од сегашните 630 на 400, а во Сенатот од 315 на 200.
Од М5С велат дека со тие намалувања, кои треба да стапат во сила на следните избори 2023 година, ќе се заштедат стотици милиони евра и ќе го направат парламентот поефикасен.
- Ова е голема победа за италијанскиот народ и граѓаните - рече лидерот на М5С и министер за надворешни работи Луиџи ди Мајо по гласањето.
Уставната измена помина два круга гласање, Долниот дом го усвои конечно со 553 гласа „за“, 14 „против“ и два „воздржани“.
Извор: МИА