Учениците денес се гледаат себеси како дигитална популација, првата генерација што расте опкружена со технологија - паметни телефони, таблети и е-книги.

Наставниците, родителите и креаторите на политиката се свесни за растечкото влијание на технологијата и соодветно одговараат. Сведоци сме на сè поголемиот број инвестиции во технологиите во училиштата, а учениците имаат ајпади и пристап до е-учебници.

Додека новите форми на технологијата во училниците, како дигиталните учебници, се повеќе достапни и преносливи, погрешно е да се претпостави дека учениците добиваат подобра алтернатива само затоа што повеќе го претпочитаат дигиталниот учебник.

Иако студентите изјавиле дека подобро учат кога читаат од екран, нивните вистински перформанси страдаат. Истражувањата направени од 1992 година откриваат дека учениците се во можност подобро да ги разберат информациите со печатени учебници подолги од една страница. Се чини дека ова е поврзано со лошиот ефект што „скролањето“ го има врз разбирањето и сфаќањето на текстот.

Истражувачите спровеле три истражувања што ги анализирале способностите на студентите на факултет да ја разберат информацијата на хартија или екран.

Студентите прво ги оценувале нивните медиумски наклонетости. По читање два пасуса, еден онлајн и еден печатен, овие студенти извршиле три задачи: ја опишале главната идеја во текстовите, ги наброиле клучните точки опфатени во читањето и ги обезбедиле сите други релевантни содржини на кои можеле да се сетат.

Кога го направиле сето ова, од нив било побарано да ги проценат нивните перформанси за разбирање.

Ова се наодите поврзани со разликите меѓу читањето на печатената и на дигиталната содржина:

- Студентите преферирале да читаат дигитално;
- Читањето било значително побрзо онлајн отколку печатено;
- Студентите процениле дека нивното разбирање е подобро кога читаат дигитално отколку печатено;
- Парадоксално, целокупното разбирање било подобро кога тие читале печатено, наспроти дигитално.

Но кога дошло до специфични прашања, разбирањето било значително подобро кога учесниците читале печатени текстови.

Печатењето во перспектива

Од овие наоди произлегуваат лекции што можат да им бидат пренесени на политичарите, наставниците, родителите и учениците за местото на печатените учебници во дигиталниот свет во кој живееме денес.

1. Размислете за целта

Сите читаме заради многу причини. Понекогаш бараме одговор на многу конкретно прашање. Другпат сакаме да го разгледаме весникот со денешните наслови.

Кога ја избираме статијата или текстот во печатен или дигитален формат, треба да имаме на ум зошто читаме. Веројатно постои разлика во тоа кој медиум функционира најдобро за одредена цел.

2. Анализирајте ја задачата

Еден од најконзистентните наоди од истражувањето е дека за некои задачи, медиумот не изгледа важен.

Ако на сите студенти им е дадена задача да ја разберат и да се сетат на големата идеја или обележје на она што го читаат, нема корист во изборот на еден медиум во однос на друг. Но кога задачата за читање бара поголемо ангажирање или подлабоко разбирање, на студентите можеби ќе им биде подобро да читаат од печатен медиум.

Наставниците може да им посочат на учениците дека нивната способност да ја разберат задачата може да биде под влијание на медиумот што го избираат.

3. Забавете

Во истражувањето било откриено дека постои група студенти што подобро го разбирале текстот кога се префрлиле од печатена во дигитална форма. Она по што се разликувала оваа група било тоа што читала побавно кога текстот бил даден на компјутер отколку во книга.

4. Нешто што не може да се мери

Постојат економски и еколошки причини за некористењето хартија. Но постои нешто важно што би било изгубено со смртта на печатот. Во нашиот академски живот постојат книги и статии на кои се навраќаме. Тешко е да се замисли слично ниво на ангажман со дигиталниот текст.