Трајче Кацаров, автор на поемата „Цветко“, ја доби наградата за најдобра поема во ракопис за 2021 година која ја доделува НУЦК „Григор Прличев“ Охрид.
Тој е поет, раскажувач, есеист и драмски автор и вработен како драматург во НУЦК „Ацо Шопов“ – Народен театар Штип. Тој е наставен доцент на Интернационалниот универзитет за аудио-визуелни уметности „Еуропа Прима“. Во 1993 година го основа Списанието за уметност - СУМ и е негов главен и одговорен уредник. Во 1996 година со група истомисленици го основа списанието - Месечникот за театар „Тренд театар“ и станува негов уредник. Во 1997 година со група автори го основа весникот на ДПМ „Стожер“. Од 2017 година е главен и одговорен уредник на „Стожер“. Како издавач има објавено триесетина книги од науката, есеистиката, уметноста и публицистиката, меѓу кои се: „Маларме“ од Ги Мишо, „Вера и скпеска“ од Јиржи Менцел, „Системот на Антонен Арто“ од Вадим Максимов, „Актерската игра“ од Михаил Чехов.
Наградената поема „Цветко“ ја третира вечната тема за човековата ранливост и минливост, (не)исполентоста на очекувањата во дослух со самиот себе, но и со традицијата, менталитетот, обичаите карактеристични за поднебјето во кое живееме.
Поемата „Цветко“, пишувана во модернистички манир, претставува вешто компониран поетски исказ, сугестивен и хармоничен, згуснато сензитивен и напати спокоен, кој, преку навидум едноставниот лирски расказ за животот на Цветко, отвора суштински егзистенцијалистички прашања кои го следат животот на главниот лик – Цветко, стои во образложението од НУЦК „Григор Прличев“.
Наградата на лауреатот ќе му биде врачена на традиционалната манифестација „Прличеви беседи“ што се одржува на почетокот од февруари.