Неодамна од САД пристигнаа страшни вести за масовни убиства во кои загинаа десетици лица. Тоа предизвика нови дебати во американската јавност.

И додека за мнозинството проблемот е во достапноста на оружјето, еден дел, меѓу кои е и претседателот Доналд Трамп, меѓу виновниците ги ставија и видеоигрите, велејќи дека го глорифицираат насилството.

Изгледа дека некои компании „паднаа“ на ова, па сакајќи да ги избегнат потенцијалните негативни ПР-моменти, решија накратко да се оддалечат од игрите.

Познатата телевизиска куќа И-ес-пи-ен (ESPN), најпозната светска спортска медиумска агенција, викендов требаше на вториот канал да пренесува турнир од „Апеџ Леџендс“, но преносот беше тргнат од програмата и беа репризирани некои емисии. Од телевизијата велат дека тоа било направено за да се испочитуваат жртвите, иако многумина не гледаат каква е поврзаноста на турнирот со пукањата и сметаат дека тоа е политичка одлука.

Покрај тоа, популарниот синџир продавници „Волмарт“ направи слични потези и според повеќе извори, вработените добиле инструкции да ги отстрануваат плакатите, рекламите и другите предмети што би можеле да се поврзани со насилство, без разлика дали станува збор за игри или филмови. „Волмарт“ е позасегнат од ситуацијата бидејќи и во неговите простории имаше убиства, но ова секако нема да го реши проблемот.