Пред околу 100 години Вал-Џалберт во Канада бил многу модерен град. Жителите имале вода и струја 25 години пред остатокот од Квебек. Но, многу малку работи се промениле од тие денови.
Денес, градот во близина на Квебек останува совршено зачуван остаток од неговите славни денови во раните 20-ти години на минатиот век. Во текот на неговиот најславен период, Вал-Џалберт бил индустриски град.
Фабриката за целулоза донела просперитет во регионот, но низа неволји довеле до ненадејно затворање на фабриката во 1927 година. Поминале само неколку години пред градот да биде речиси целосно напуштен.
Така останал до 60-тите години кога станал туристичка атракција. Според веб-страницата на градот, во 2009 година Вал-Џалберт добил над 19 милиони долари од Одделот за култура и комуникации на Квебек и Агенцијата за економски развој на Канада за реновирање на градската инфраструктура и поттикнување на туризмот.
Посетителите можат да го истражуваат градот кој останал ист каков што бил пред 100 години. Постојат повеќе од 40 згради, секоја сочувана и одржувана, што им овозможува на патниците да се чувствуваат како да се вратиле назад во времето. Гостите можат да посетат манастирско училиште, продавница, па дури и познатата фабрика во градот. И за искуството да биде уште подобро, градот е населен со актери кои играат ликови инспирирани од 20-тите години.
Освен што ќе ве привлече градот кој е како временска капсула, тука е и живописното природно опкружување. Иако можеби не е најпознатиот водопад во Канада, водопадот Уиатчуан е повисок од Нијагарските Водопади.
Извор:
Travelandleisure.com
Фото:
Wikipedia