Министерот за здравство д-р Венко Филипче на денешната прес-конференција на Клиниката за кардиологија изјави дека вакцинацијата се спроведува во сите вакцинални пунктови во државата, во салите се одвива ревакцинација, додека во здравствените домови низ земјата се одвива вакцинација без закажан термин. Во тек е и теренската вакцинација која има цел да им го олесни пристапот на жителите од руралните средини и тешко достапни места како би имале можност да бидат вакцинирани, пишува во соопштението од Министерството за здравство.
Во изминатите три дена откако е започната теренската вакцинација, досега се вакцинирани околу 30%, теренската вакцинација ќе продолжи и во следниот период. Досега се вакцинирани околу 400.000 граѓани, а ревакцинирани се 250.000 граѓани.
Министерот Филипче апелира до сите граѓани да се вакцинираат бидејќи тоа е единствениот начин како да се справиме со евентуално новиот бран кој би се појавил наесен. Податоците покажуваат дека 85% од здравствените работници се веќе вакцинирани, како и поголем дел од воспитно-образовниот кадар.
За евентуални нови рестриктивни мерки, Филипче изјави дека доколку наесен опфатот на вакцинирани граѓани не е доволно голем, ќе се воведат нови мерки, вакцинален сертификат кој ќе биде задолжителен за влез на настани на затворено, како и за организирање масовни настани. Важноста на имунизација на населението е клучна за справување со пандемијата, затоа е важно граѓаните што поскоро да го сторат тоа, порача министерот.