Вселенскиот телескоп „Џејмс Веб“ е најнапредната вселенска опсерваторија изградена досега. Телескопот треба да биде лансиран во вселената кон крајот на овој месец, а ќе се обиде да одговори на клучни прашања за универзумот.

Огромно златно огледало

Главниот дел на телескопот е неговото огромно огледало, широко 6,5 метри, кое е направено од 18 помали огледала. Тие се направени од позлатен берилиум и треба да ја рефлектираат инфрацрвената светлина која доаѓа од големи далечини.


Телескопот има и научни инструменти за фотографирање и разложување на светлината на повеќе бранови должини за истражување на физичките и хемиските состојки на материите во вселената. Огледалото и инструментите се заштитени со петслојна заштита од сонце која може да се отвори и да има големина на тениско игралиште.

Во телескопот има и системи за електрична енергија, погон, комуникација, ориентација, греење и чување податоци. Тој тежи колку еден автобус.

Далечно патување

Телескопот ќе биде оставен во орбитата на околу 1,6 милион километри од Земјата. Тоа е приближно четирипати подалеку од растојанието помеѓу нашата планета и Месечината. „Џејмс Веб“ ќе кружи околу Сонцето и секогаш ќе се наоѓа на ноќната страна на планетата.


Тој ќе стигне до оваа локација по околу еден месец откако ќе биде лансиран. Ниту еден човек не патувал толку далеку колку што ќе патува телескопот.

Технолошко оригами

Телескопот е преголем за да го собере во ракета, па затоа ќе биде склопен, а потоа расклопен, како оригами. Тој ќе се расклопува постепено за време на патувањето и ќе може да биде ставен во функција по околу 6 месеци.

Мисии

„Џејмс Веб“ има две главни научни мисии: да ги истражува раните фази од космичката историја и да открива планети надвор од нашиот Сончев Систем. Тој ќе истражува и знаци за можен живот на овие планети со анализа на нивните атмосфери. Способноста за снимање во инфрацрвена светлина ќе му овозможи да открива повеќе од претходните телескопи.


Се градел со децении

Астрономите почнале да разговараат за телескопот кој ќе биде следниот најнапреден по „Хабл“ во 90-тите години, а изградбата на „Џејмс Веб“ започнала во 2004 г. Лансирањето било одложено неколкупати поради тешкотии во изградбата.

Опсерваторијата е резултат на меѓународна соработка, а во него се вклучени канадски и европски инструменти. На проектот работеле над 10.000 луѓе, а неговото производство чинело околу 10 милијарди долари.

Мисијата на телескопот треба да трае најмалку 5 години.

Извор: Science Alert