Трансплантација на срце кое престанало да чука наскоро ќе биде возможно и во Хрватска. Потребната технологија за изведба на оваа операција е вредна повеќе од 1.5 милиони евра, а Министерството за здравје го поддржа проектот.

 

Ова е доста голем новитет во хрватската медицина, особено со оглед на фактот што оваа операција може да се направи само во две други земји во светот - Австралија, и од неодамна Велика Британија.

Револуционерната операција е можна преку користење на уреди и техники на OCS (Organ Care System) кој овозможува времето на транспорт на срцето наменето за трансплантација да се продолжи на повеќе од четири часа, на колку што досега беше ограничено.

Уредот OCS, популарно наречен „срце во кутија“, ги оживува срцата и ги храни со потребните хранливи материи имитирајќи услови на човечки организам.

Докторката Јасна Брезак, која знае како да го користи овој уред, укажува на досегашните проблеми при операција на трансплантација на срце.

„Со секој поминат час, кај пациентот стапката на смртност се зголемува за 20%. Четири часа се доста кратко време. Тоа значи дека за четири часови мораме да стигнеме од некоја донаторска болница на северот на Европа, која не е секогаш до аеродром“, вели таа.