Американскиот мултимилијардер Бил Гејтс ќе пренесе 20 милијарди од своето богатство на „Фондацијата Бил и Мелинда Гејтс“.
Фондацијата, една од најголемите светски филантропски организации, планира да ги зголеми своите исплати за 50 отсто во споредба со нивоата пред пандемијата, од приближно 6 милијарди долари на 9 милијарди долари секоја година до 2026. Фондацијата првенствено е фокусирана на добротворни акции чија цел е подобрување на глобалното здравје, родова еднаквост и образование, меѓу другото.
Основачот на „Мајкрософт“ и неговата поранешна сопруга Мелинда Френч Гејтс ветија дека ќе ѝ донираат огромен дел од своето богатство на фондацијата што ја основаа заедно пред 20 години, како и на други филантропски организации.
- Како што гледам кон иднината, планирам да го дадам практично целото мое богатство на фондацијата. На крај, ќе ме нема на листата со најбогати луѓе во светот - изјави тој.
- Имам обврска да ги вратам моите ресурси во општеството со цел намалување на страдањата и подобрување на животите на луѓето. Се надевам дека и другите луѓе со големо богатство и привилегии ќе го направат истото - напиша Гејтс.
Гејтс долго време зборуваше за потребата да го даде своето богатство, наведувајќи го доживотното верување во решавањето на глобалните прашања како климатските промени. Тој дури рече дека неговото богатство нема да го наследат неговите деца.
Со проценета нето-вредност од околу 114 милијарди долари, Бил Гејтс моментално е четвртиот најбогат човек во светот, според индексот на милијардери на Блумберг, а најголемиот дел од неговото богатство е поврзано со акциите на „Мајкрософт“.
Фото: Screenshot/YouTube