Понеделниците се најпопуларни за посета на Кралскиот португалски кабинет за читање, големо светилиште на португалските книги и култура во Бразил и една од најубавите библиотеки во светот, сместена во срцето на градот Рио де Жанеиро.
Во библиотеката се наоѓаат речиси 400.000 антички томови. Со децении академиците имале особена почит кон оваа спектакуларна библиотека - најголемата колекција на португалски автори надвор од Португалија. Но, во последниве години таа стана сè попопуларна заднина за фотографии и селфи.
Кралскиот кабинет беше еден од малку познатите културни скапоцени камења во Рио, додека не стана вирален на „Инстаграм“ и „Тик-ток“. Како што објаснува долгогодишниот координатор на институцијата, Орландо Инасио, тоа е ефект на социјалните медиуми.
- Доаѓаат, се сликаат и објавуваат, потоа другите го гледаат тоа и сакаат да дојдат - додава тој.
Популарноста на библиотеката почна да расте кога Светското првенство во 2014 година и Олимписките игри во 2016 година се одржуваа во Рио, кога магазинот „Тајм“ ѝ ја даде титулата на четврта најубава библиотека во светот. Оттогаш нејзината слава нагло почна да расте.
Новите посетители коегзистираат, честопати непријатно, со традиционалните жители на библиотеката: научници за португалската историја, литература и култура. Неколку истражувачи, седнати на малите маси, се борат да се концентрираат на читањето поради вревата од туристите и локалните жители кои го овековечуваат моментот со своите паметни телефони. Секој може да позајми книга, вели библиотекарката Силвија Франка, но малкумина читатели ја посетуваат библиотеката за содржината на нејзината колекција.
Историјата на библиотеката е слична на другите лусофонски културни институции во земјата. Била основана пред 185 години од околу 40 португалски имигранти, по само 15 години откако Бразил ја стекнал својата независност.
- Тие ја создале библиотеката во 1837 година за да го подобрат културното образование на португалската заедница во Рио, бидејќи повеќето од оние што дошле немале формално образование - објаснува Франциско Гомес да Коста, претседател на библиотеката роден во Португалија.
Од самиот почеток, библиотеката била дизајнирана да трае: била изградена да ја издржи топлата и влажната клима во Рио, како и пожар. Ова е во голема мера она што ѝ дава уникатност на главната читалница - нејзиниот раскошен, неомануелски стил и изглед на атриум. Рамката и ѕидовите на зградата се од железо, а полиците се изградени од јакаранда, густо тврдо дрво. Трагичниот пожар во 2018 година што го проголта Националниот музеј на Бразил - најстарата научна институција во земјата, исто така лоцирана во Рио - е доволен за секој менаџер да има кошмари.
Благодарение на многуте примени донации и набавки направени во изминатите речиси два века, Кралскиот португалски кабинет за читање сега има помеѓу 350.000 и 400.000 книги.
- Мораме да бидеме прилично селективни со нашите аквизиции - вели Да Коста.
Извор:
English.elapis.com
Фото:
Facebook