Група на онколози од Центарот за истражување Фред Хачинсон од Вашингтон, верува дека пронашла револуционерна нова метода за лекување на акутна лимфобластна леукемија (ALL), која потенцијално би можела да се примени за лекување на други видови на рак.

 

Во најновото клинично истражување, докторите ги „тренирале“ Т-лимфоцитите, вид на бели крвни клетки на пациентите со помош на специјални молекули за да им овозможат да ги препознаат и нападнат клетките на туморот, а потоа да се вратат во телото на пациентот преку инфузија.

Молекулите кои ги користеле всушност се вештачки рецептори за Т-лимфоцити, кои лекарите ги нарекуваат „химерички рецептори на антиген (Chimeric antigen receptor - CAR) а се добиени со генетски модифицирани лабораторски глувци.

Овој „тренинг“ на имунолошкиот систем постигнал импресивни резултати - 94% од учесниците во клиничкото истражување ги изгубиле сите симптоми на лимфобластна леукемија. Резултатот е уште поимпресивен кога ќе се земе во предвид дека станува збор за пациенти кои биле во последните фази на болеста. Во истражувањето биле вклучени само личности за кои предвидувањата биле дека им остануваат само два до пет месеци од животот.

„Вакво нешто никогаш претходно не било забележано во медицината, и искрено, да се добијат вакви резултати кај пациенти кај кои болеста толку напредувала е вистинско постигнување“, изјави Стенли Ридел, лидер на истражувањето.

Сепак, оваа метода на лекување не е целосно без ризик. Од 35 пациенти кои учествувале во истражувањето, кај 7 од нив се појавиле сериозни несакани ефекти - реакции на имунолошкиот систем поради која завршиле на интензивна нега, додека двајца пациенти починале од последиците. Научниците моментално работат на подобрување на методите со кои би се намалил ризикот од опасни имунолошки реакции.

„Исто како хемотерапијата и радиотерапијата, и оваа метода нема да може да ги спаси сите“, признава Ридел и истакнува дека имунотерапијата конечно ќе стане еден од столбовите за борба против ракот.

Следниот чекор ќе биде користење на помала доза на модифицирани Т-лимфоцити, за да се намали опасноста од несакани ефекти, а Ридел би сакал да ја проба имунотерапијата и на поцврсти тумори, за што е свесен дека тие ќе претставуваат уште поголем предизвик.

Резултатите од најново истражување, се предадени на стручен преглед и наскоро треба и официјално да бидат објавени во релевантен научен магазин.