Неодамна, Македонија доби речник на правни поими. Книгата беше промовирана во јануари во Битола, кадешто говореа доц. д-р Горан Илиќ, продекан за наука на Правниот факултет во Битола и авторот, Александар Георгиев – Калица. Досега, во земјава имало само лексикони на правни поими и помали речници за специфични области, но ова е прв комплетен речник на правни поими на македонски јазик. Повеќе за речникот и за начинот на кој може да се набави дознаваме лично од авторот.
Факултети.мк: Кажи ни накратко за речникот. Колку поими содржи?
Александар: Речникот содржи преку 2.000 правни поими чии дефиниции се изведени првенствено од целокупната позитивна законска регулатива на Република Македонија, поголем број на меѓународни конвенции како и избрана правна литература од Македонија и регионот. Покрај правните поими речникот содржи и 280 познати латински правни изреки преведени на македонски јазик, кои често се споменувани и користени во правото. Поимите се внимателно избрани, посебно оние кои најчесто се употребуваат во правниот промет и тековното работење.
Факултети.мк: Беше ли тешко да се напише речникот, посебно како единствен автор?
Александар: За составување на речникот ми беа потребни околу 2 години. Најтежок дел беше подготовката и концептот на систематизирање на поимите, за кои потрошив повеќе време, а тоа од причина што ваквиот тип на изданија во Македонија се ретки и обично се однесуваат на конкретна област. За подготоваката на речникот морав да ја прегледам целокупната законска регулатива и меѓународни конвенции како и обемна стручна литература за што беше потребно доста време и труд . Како прво издание од ваков тип сметам дека допрва истото треба да се надградува и дополнува, од причина што се работи за динамична и обемна материја.
Факултети.мк: Каде ја гледаш примената на речникот на правни поими, покрај правниците?
Александар: Покрај правниците речникот може да најде голема примена во работењето на компаниите посебно во правните служби,кај јавната администрација, судските преведувачи, студентите и кај секој граѓанин кој е заинтересиран да научи нешто повеќе. Исто така овај речник би имал значајна примена и кај новинарите посебно за оние кои известуваат за одредени судски постапки или настани од областа на правото.
Факултети.мк: Како луѓето може да стигнат до речникот?
Александар: Речникот може да се нарача електронски преку
сајтот на Правдико.мк со пополнување на формулар, при што книгата ќе им биде испратена до адреса со карго служба.