28 студенти на возраст од 20 и 21 година во мај славеле за положен испит по анатомија и сега може да бидат казнети затоа што постапиле спротивно на здравствените прописи за време на пандемија, соопшти Основното јавно обвинителство Скопје.
- ОЈО поднесе предлог за издавање казнен налог против вкупно 28 лица за кривично дело – непостапување според здравствените прописи за време на епидемија од член 206 став 1 од Кривичниот законик. Обвинетите, сите на возраст од 20 и 21 година, на 21 мај во раните утрински часови биле затекнати при проверка во стан на улицата „Славејко Арсов“ каде што биле собрани на прослава за положен испит по анатомија. Со ова тие постапиле спротивно на прописите со кои се определени мерки за спречување на коронавирусот, а со кои се забранува групирање на прослави и други собири заради заштита на здравјето на населението - се наведува во
соопштението.
Во него стои и дека надлежниот јавен обвинител до Основниот кривичен суд Скопје доставил предлог да определи парични казни за сите обвинети од по 100 дневни глоби, при што поединечната вредност на дневната глоба да биде одредена на 20 евра во денарска противвредност.
Насловна фотографија: Unsplash