Музиката на единствените „Пинк Флојд“, во оркестрација на Џијан Емин вечерва од 21 часот ќе одекне во Градскиот парк во Скопје. Публиката ќе може да ги слушне ремек-делата на култните „Пинк Флојд“, на отворено на веќе традиционалниот настан „Види музика, слушни слика, добиј книга“.



Со оркестарот на Македонската филхармонија ќе диригира Џијан Емин, а главен вокал и гитара ќе биде Ади Имери. Бендот е составен од: Александар Поп Христов, гитара, Иван Бејков, електричен бас, Александар Пујовски, гитара, Мартин Вучиќ, тапани, Благоја Перуновски, клавијатури, Маријана Николовска, пијано и Владимир Поп Христов, Сара Николовска и Ана Костадиновска, придружни вокали. За време на концертот, на големи платна ќе сликаат уметниците Јулијана Гешовска и Илија Спасовски-Чендо, а посетителите ќе добијат бесплатен примерок од книгата „За одењето по мраз“ од Вернер Херцог.

Концертот ќе одбележи исклучителна сезона на Македонската филхармонија, исполнета со врвни концерти и конечното отворање на салата.