На почетокот на јули оваа година, пред спуштањето на завесата на досега најдобро организираниот ракометен камп, капитенот на македонскиот национален тим - Кирил Лазаров и неговиот тим го најавија следниот голем проект за развој на македонскиот ракомет, школата за ракомет „Кирил Лазаров 7“. Шест месеци подоцна проекциите за отворање минимум седум школи во исто толку градови се натфрлени и во моментов школата на најдобриот македонски спортист брои единаесет школи со повеќе од 500 момчиња и девојчиња.



Идејата на Лазаров е да му се овозможи ракомет на секое дете без разлика на местото и условите во кои тоа живее, да му се овозможи иста шанса да тренира и да сонува дека еден ден, исто како неговиот идол Кирил, ќе игра на големата сцена и ќе го носи дресот со националниот грб.

За таа цел, покрај школите во Скопје, Струга, Охрид, Куманово, Тетово, како големи градови и општини, школата за ракомет е присутна и во Богданци, Стојаково, Чешиново-Облешево, Валандово, општини во кои нашите најмлади членови првпат се запознаваат со ракометот како спорт.

- Покрај тоа што ние како организатори на овој проект сме максимално посветени во обезбедување што подобри услови за тренинг во делот на опремување на секоја школа со сè што е потребно, од опрема, реквизити и топка за секое дете, нашата насока во иднина ќе оди и кон едуцирање и надградба на тренерскиот кадар како важен сегмент. Свесни сме дека без разлика на тоа колку е важно да се обезбедат врвни услови за тренинг на овие деца, сепак, како клучен го гледаме факторот човек, односно особено внимание ќе обрнеме со нашите деца да работат врвни педагози и стручни лица. Со тоа успехот е неминовен. Потребно е само време – вели Горан Ѓорогонски од агенцијата „КМГ Спорт“.



Секако дека со овој проект зад кој, како организатор и техничка поддршка, стои агенцијата „КМГ Спорт“, покрај социјалниот момент кај најмладите во нашата држава, во соработка со своите партнери и пријатели ќе го следиме и физичкиот развој на секое дете, ќе го едуцираме за правилен и здрав начин на исхрана и ќе го насочуваме кон вистинските вредности.