Не, не е „лада“

Да се биде возач во Јакутија, Тајмир и Чуктока воопшто не е лесно, пишува Ана Сорокина во текст за порталот „Раша бијонд“, кој е многу интересен зашто детално објаснува кои марки на автомобили и зошто најмногу се користат на истокот од Русија, каде што температурите во зима се спуштаат и до 50 степени под нулата.

Луѓето мора да се приспособат на условите, па според тоа и одбираат технологија која е доволно издржлива за превоз на најниските можни температури.

Жителите на Јакутск, Норилск и Ворукта, но и во западните градови како Новосибирск или Иркутск својот автомобилски живот го живеат како никој друг.

Јакутија е најголемиот и најстуден регион во Русија, каде што на две места - во Ојмјакон и Верхојанск - се забележани температури и до -70 степени, а во Јакутск, главниот град на регионот, -50 степени е вообичаена појава во текот на зимата, пишува Сорокина.

Ако сте се запрашале што најмногу се вози таму поради ледените зимски услови и сте помислиле на некои големи теренци или возила со повеќе од 4 тркала, сте се излажале.

На улиците во најисточните руски региони може да се видат најмногу јапонски, главно постари модели карактеристични за јапонскиот пазар со управувач на десната страна.

Причината е тоа што Јапонија е блиску, па истокот на Русија се снабдува со поволни возила од таа земја, најмногу преку пристаништето во Владивосток, каде што пристигнуваат многу бродови со илјадници стари автомобили, а цените се многу пристапни. Тоа што управувачот е на десната, а не на левата страна нема никаква врска и не е пречка при регистрирањето.


Во 2020 година првото место го зазела „тојота јарис“, а второто „тојота корола“. Следуваат седаните „тојота алион“ и „премио“ и миникомбето „тојота ипсум“. Сите тие модели се покажале добри во зимски услови, а покрај тоа и не трошат многу, што е многу важно со оглед на тоа дека возачите во Јакутија не го гасат моторот некогаш и по неколку недели за да не им „се замрзнат“ автомобилите.

Некои сопственици во автомобилите дополнително вградувале опрема за загревање на моторот и внатрешноста на автомобилот, па животот на -50 степени сепак е поподнослив.

Прегледот на моделите на автомобили, на пример, во Норлиск, каде што теренот е многу ладен и тежок за возење, покажал дека и таму најзастапена е „тојота“, и тоа со теренскиот модел „ленд крузер“.

Следуваат руската „лада“ (најчесто новиот модел „веста“), па „киа рио“, „хјундаи соларис“ и „нисан Х-трејл“. На Чукотка сликата на возниот парк е речиси иста.

Но, не се возат само јапонски автомобили, има и многу кинески, а руската гордост на северот на Русија ја бранат современиот теренец „УАЗ патриот“, потоа легендарниот минибус или комбе УАЗ-452 (2206 „уханка“), кој без измени се произведува уште од советско време. Го користат службите на итната помош, полицијата, меѓуградските превозници, приватниците и компаниите. Речиси сите се приспособени на екстремните зимски услови и нема конкуренција во однос на цената (11.500 евра).

Популарно е и поголемото комбе „ГАЗ собољ“, кое исто така често го користат државните служби и превозници, како и теренецот УАЗ-469 или „хантер“, кој непроменет се произведува веќе 51 година и е многу популарен.

Она што е карактеристично за сите автомобили во Сибир е погонското гориво. Станува збор исклучиво за бензинци поради познатиот проблем на смрзнувањето на дизелот на ниски температури. Притоа, тоа што со денови се со запалени мотори не е некој проблем затоа што горивото е многу поевтино.

Извор: Jutarnji
Фотографии: Pixabay