Инклузија на лицата со посебни образовни потреби, обезбедување физички услови за учениците со физичка попреченост кои во моментот се исклучително ограничувачки, формирање инклузивни тимови во училиштата, унапредување на капацитетите и екипирање на стручната служба со педагози, психолози и специјални едукатори. Ова е дел од Стратегијата за развој на образованието 2018-2025, а министерката за образование и наука Рената Дескоска вчера му ја претстави на комесарот за човекови права на Советот на Европа, Нилс Мужниекс, кој е во официјална посета на Македонија.

Тие дискутираа за клучните предизвици во наредниот период во однос на почитувањето на човековите права, на различностите и подобрување на меѓуетничката интеграција во предучилишното, основното и во средното образование.

Министерката се осврна на интеркултурното образование, кое во моментот не е соодветно отсликано во наставните или воннаставните активности. Дескоска и Мужниекс разговараа и за унапредување на меѓуетничката интеграција во училиштата како место каде што учениците треба да се воспитуваат во духот на толеранцијата, мултикултурализмот и соживотот.