Годинашната сезона на грип бележи најголем број на случаи, предизвикувајќи повеќе од 17.000 хоспитализации од октомври 2017 година според центрите за контрола на зарази и превенција. Сега, производител на лекови од Јапонија тврди дека развил пилула која има способност да го уништи вирусот за само еден ден.


Пациентите болни од грип од САД и од Јапонија учествувале во неодамнешна студија на јапонската компанија, при што се тврди дека вирусот исчезнал од нивните тела за околу 24 часа. За споредба, популарната пилула „тамифлу“ го уништуваше вирусот 3 пати побавно. Производителите на новата пилула тврдат дека е потребна само една доза за пилулата да биде ефективна.

Вирусот ги тера човечките клетки да произведуваат вирусен материјал наместо протеини, па така и брзо се проширува вирусот низ телото. Додека моменталните лекови го спречуваат вирусот да се шири и да инфицира повеќе клетки, новиот лек спречува дури и создавање на вирусниот материјал.

Истражувањата за справување со грипот најчесто вклучуваат подобрување на веќе постојните вакцини, а не развивање нови третмани. Сепак, овој проект може да биде клучен чекор напред во борбата против грипот. Од компанијата што го произведува лекот велат дека е можно да продолжат со испитувањата во текот на наредниот месец. Барање за одобрување во САД ќе биде поднесено во текот на летото, но одговор ќе биде добиен во 2019 година.