Сите образовни институции во Косово денес штрајкуваат. Настава нема да се одржува ниту во основните, ниту во средните училишта, ниту пак на универзитетите.



Ова е трет штрајк во неколку недели организиран од страна на косовскиот Обединет синдикат за образование, наука и култура. Синдикатот бара нацрт-законот за статусот на просветните работници од 90-ите години да биде испратен во Парламент. Сепак, владата нема предвидено пари од буџетот за овој нацрт-закон.

Претседателот на Синдикатот, Рахман Јашарај, најави и штрајк на неопределен период кој би започнал од 13 април, ако владата нема слух за нивните барања. Косовската влада побара време од синдкатот, а Министерството за финансии истакна дека во моментот нема финансии за имплементирање на барањата. Од Министерството за образование, пак, истакнаа дека тие на време го испратиле нацрт-законот во владата.

-Министерството за образование, наука и технологија на време го процесираше до владата нацрт-законот за статусот на просветните работници во периодот од 1990 до 1999 година - истакнаа од министерството.

Оттаму додаваат и дека тие биле во постојана комуникација со Синдикатот и го информирале дека се заинтересирани што побрзо нацрт-законот да биде ставен на вистинскиот пат. Според Министерството, овој штрајк е неоснован.

Синдикатот и минатиот месец одржа вакви штрајкови. На 14 февруари се одржа едночасовен, додека на 20 февруари двочасовен штрајк. Тие имаат и други барања за кои разговараа со косовскиот премиер и надлежните министри.