Ако случајно забележите вертикална лента со виолетова светлина што игра на небото на северната хемисфера, не плашете се. Станува збор за Стив.

Токму така, Стив. Станува збор за феномен што го откриле група љубители на аурора бореалис во 2016 година. За разлика од стандардната аурора за која знаеме сите, Стив е повеќе тесен лак на светлина. Љубителите на аурора бореалис му го дале името Стив во чест на анимираниот филм „Over the Hedge“, во кој неколку шумски суштества го користат името Стив за непознат објект за да им изгледа помалку застрашувачки.

Зошто Стив е различен?

Прво и основно, Стив не е аурора. Иако истражувачите со години шпекулираа дека Стив е како другите аурори поради неговата локација и движења, истражување од 2018 година ја негира оваа идеја. Кога Стив се појавил во март 2018 година, поларниот орбитациски сателит на Националната океанска и атмосферска администрација мерел за да ги открие наелектризираните честички на небото околу Стив. Не биле откриени никакви наелектризирани честички. Затоа, процесот на создавање на Стив не е ист како кај аурората.

- Нашите резултати потврдуваат дека Стив е различен од аурората бидејќи се карактеризира со отсуство на врнежи од честички. Интересно, неговото сјаење може да биде генерирано од нов и фундаментално различен механизам во јоносферата - вели авторката на истражувањето, Беа Галардо-Лакурт.

Што знаат научниците за Стив?


- Стив можеби е единствениот визуелен доказ што постои за да ја покаже хемиската или физичката поврзаност помеѓу ауроралната зона со повисока ширина и пониската ширина на субауроралната зона - вели Лиз Мекдоналд од НАСА.

Стив може да се види околу 20 километри вертикално (насока север-југ) и 2.100 километри хоризонтално (насока исток-запад), вели друго истражување спроведено во 2019 година од Галардо-Лакурт и нејзиниот тим. Исто така, тие откриле дека Стив трае околу еден час и обично се случува по суббури - нарушување во магнетосферата кога енергијата од „опашката“ на Земјата влегува во јоносферата.