Нервозни сме сите бре, се брзаме цело време за некаде, а и сами не знаеме за каде. Под стрес сме, арогантни сме, возејќи пцуеме и наглас, а и во себе ги пцуеме пешаците што стапнале пред нас на пешачки премин

Добро би било нели, ама не, Скопје не свири џез, свири турбофолк, ајдиџеј видеос и свират коли.
Моето убаво Скопје, свири и пее жалопојки, смрди на чад и сиромаштија исто толку колку што смрди на кич и фолирање.
Гужвесто е како никогаш досега, сообраќајот не го оправа ни полиција. Нервозни сме сите бре, се брзаме цело време за некаде, а и сами не знаеме за каде. Под стрес сме, арогантни сме, возејќи пцуеме и наглас, а и во себе ги пцуеме пешаците што стапнале пред нас на пешачки премин.

Еее, како мали нè учеа дека попаметниот попушта, а одма после тоа и дека ако сакаме да сме успешни, треба да сме „гадови“ бидејќи само таквите успевале нели, и ај сега!? Изгледа работава е биди паметен прави се глуп.

Категорија - ергенчиња пенисклатници, со лопата да ги ринеш. Триесетгодишни веќе, проќелави беќари со пивски стомак живеат со своите, демек подработуваат нешто, зборуваат и сонуваат за ветената земја. Искачаат со сакич пиц-пец залижани, нарачуваат виски фиксно, пушат евтина пура и се у фазон на репетирана пушка, а немаат ни комбинација ни динар.

Категорија - педантни, бел ден не гледаат од работа, немаат време ни за себе ни за девојка да си најдат. Времето им минува со евтини девојки бидејќи само такви останаа, а за да најдат асална, треба да се најдат во моментот на раскинување на девојката, односно излагање од врска и тогаш да улетаат со клизачи. Е тие ти се прави среќници, благословени од животот.

Категорија - фолиранти, патат во себе, а глумат среќни. Муабетот вика: „Рано е, што ќе се врзувам, да ме боли глава, да ме контролира некоја цело време“, а они кутрите од што не можат да си најдат сродна душа, имаат мигрена.

А има и такви што си фатија навреме сериозна врска од средно или слично и си останаа и до ден-денес заедно.
А жените? Тие се инспирација за животот.

Категорија - скапандурчиња, жени без љубов во себе водејќи се низ материјалната призма, кои на крај завршуваат со проќелави, издеформирани богати опинци кои „милионите“ ги фрлаат на маса при секоја битна и помалку битна прилика.

Категорија - нарцисоидни ливадарки, тие се фригидни девојки кои пуштаат водичка насекаде, а после вешто бегаат од бранот, себични се, заљубени во самите себе и во нивните домашни миленичиња. Тие имаат критериум, разбираш, шетаат низ светот, планинарки се, односно ливадарки. Го прават тоа за стори и слика.

Скопје смрди на фолирање и лажни вредности. Смрди ноќниот живот, урла бетер од мишка што заборавила да стави стик во сабота вечер.

А кафана? Кафана не смее да трпи! Единствено ние ги трошиме последните пари за домашна во кафана и за домашна во кладилница!

Тука е и „Инстаграмот“, кој нè преврте сите! „Инстаграм“ ти е како пазар 3 со годиште и со цена кој ќе даде повеќе. Сѐ има во него, но јас го сакам бидејќи сите се среќни во него! Добро лажно, но малтене такво ни е и општеството.

Да си најдеш вистинска љубов денес е речиси исто толку тешко колку што е тешко да го зезнеш системот. А системот ни намига и нè дупчи сите, влезени во бубањот кој врти и меле, со чест на исклучоците.

Љубовта мора да е некаде во воздухот, ја осеќам смрди како никогаш досега!