Преку дигитална платформа ќе се овозможи сите релевантни податоци од Водната книга да бидат јавно и лесно достапни за сите засегнати страни
Граѓаните добиваат увид кои компании и претпријатија имаат дозволи да ги користат и да испуштаат во водите или да ископуваат песок, чакал и камен од реките и езерата. Денес по повод Светскиот ден на водата - 22 Март, кој годинава се одбележува под мотото „Подземни води - правење на невидливото видливо“, беше презентирана нова методолгија за следење на квалитетот на површинските и подземните води, како и Водна книга, која е дигитална платформа за управување со водите.
Од Институтот за комуникациски студии (ИКС), кој ја спроведува кампањата „Разбистри се“, велат дека надлежните органи ќе може полесно да ги следат и казнуваат оние што не постапуваат според дозволите и да ја спречат деградацијата на водите.
- За пореална слика на состојбите со водните ресурси, се стандардизира и мониторингот врз квалитетот и квантитетот на површинските и подземните води. Ова се овозможува со дигиталната платформа за Водната книга, база на податоци за управување со водите, и со Методологијата за мониторинг на водните тела, кои за потребите на Министерството за животна средина и просторно планирање (МЖСПП) беа изработени во рамките на кампањата 'Разбистри сè' - велат од Институтот за комуникациски студии.
Од Институтот појаснуваат дека дигиталната Водна книга ги содржи информациите за издадените дозволи и концесии од Секторот за водите при МЖСПП.
- Таа обезбедува континуирано да се одржува информативниот систем за дозволите и нивно следење, а за граѓаните и инспекциските органи овозможува слободен пристап до информациите од системот, без посебни барања и постапки - велат од ИКС.
Од Институтот додаваат дека податоците од Водната книга ќе овозможат увид на влијанијата врз водите, да се утврди потеклото на загадувањето и да се оцени дали оптоварувањето врз водните ресурси се врши согласно дозволите. „Јавноста има право за пристап до податоците од животната средина и да знае за начинот и условите на користење на водните ресурси. Преку оваа дигитална платформа ќе се овозможи сите релевантни податоци од Водната книга да бидат јавно и лесно достапни за сите засегнати страни“, изјави министерот за животна средина и просторно планирање Насер Нуредини.
Стандардизираната методологија за мониторинг донесена од Министерството за животна средина, со која треба да се следи состојбата на површинските и подземните води, е подготвена од професори од Институтот за биологија при ПМФ во Скопје и експерти од УХМР и Хидробиолошкиот завод - Охрид.
- Следењето, оценувањето и класифицирањето на квалитетот на водата е од витално значење за човештвото и е директно поврзан не само со човековата благосостојба, наводнувањето и исхраната, туку и со опстанокот на различни живи организми кои придонесуваат за еколошката рамнотежа на планетата Земја - рече професорката Рената Ќуштеревска, раководителка на Институтот за биологија при ПМФ - Скопје.
Институтот за комуникациски студии ја спроведува кампањата „Разбистри се“ со помош на Амбасадата на Велика Британија.