Додека другите земји каскаат зад блокчејн-технологиите, Франција со големи чекори граби кон технологиите што би можеле да го променат светот во иднина.

Така во Париз е основан првиот европски акцелератор посветен само на стартап-компаниите што развиваат блокчејн-технологии – Chain Accelerator.




„Во моментот кога претседателот и владата сакаат Париз да го претворат во средиште на ICO (Initial Coin Offering), акцелераторот се позиционира како клучен играч“, истакна коосновачот на Chain Accelerator, Никола Канту, и додаде дека се надеваат дека Париз ќе ги собере најдобрите лица што ќе развиваат блокчејн-проекти за различни сектори.

На стартап-компаниите ќе им бидат на располагање дури 30 ментори што работат со угледни светски компании и имаат одлични познавања од оваа технологија.

Бидејќи блокчејн-технологијата сè уште не е правно регулирана во повеќето земји, од Chain Accelerator се надеваат дека нивните проекти и стартапи ќе помогнат во создавањето добра законска рамка, како и во позиционирањето на Франција како земја-предводник по прашањето за користење на таа технологија.

Иако само што почна со работа, овој акцелератор веќе удоми 13 стартап-компании кои влегоа во шестмесечната инкубациска програма. Меѓу нив е и BC Diploma, стартап кој сака со еден клик да ги сертифицира дипломите, како и Gimli, децентрализираната платформа за пренесување и гледање е-спорт средби.