Повеќето работодавци не веруваат дека постдипломските студии на работниците им даваат предност во однос на нивните вештини, покажа најновата анкета.
Само 19 отсто од работодавците изјавиле дека студентите со магистратура имаат подобри вештини отколку оние што не поминале постдипломски квалификации, открива анкетата од Институтот за работодавци на студенти од Британија.
Извештајот покажува дека работодавците во секторот за поширока потрошувачка воопшто не ја ценат квалификацијата, додека само 6 отсто од работодавците во ИТ-секторот виделе придобивки од постдипломските студии на вработените.
Дури и онаму каде што работодавците ја ценат магистратурата, како што е јавниот сектор, дипломираните студенти не напредуваат побрзо од оние со други квалификации.
Само 12 отсто од работодавците изјавиле дека магистратурата овозможува побрз напредок во однос на платата.
- Магистрите се третирани како и сите други вработени. Не одат побрзо на патеката и не се платени дополнително. Мислам дека ова е шок за студентите со магистратура кои одат на пазарот на трудот - вели Стивен Ишервуд, главен извршен директор на Институтот за работодавци на студенти од Британија.
- Студентите не треба да очекуваат работодавците да им дадат покачување на платата само затоа што имаат магистратура. Само затоа што поминале низ процесот на магистерски студии не докажува дека тие вештини ќе „поминат“ во светот на вработувањето - додава тој.
Исто така, истражувањето покажа дека работодавците се речиси четири пати позагрижени за тоа како практикантите се облекуваат на работа во споредба со дипломираните студенти.
Но, постојат мали
разлики во клучните вештини, како што се издржливост, лидерство и справување со конфликт.