На американските факултети оваа пролет се запишале повеќе од половина милион студенти помалку во однос на минатата година, според истражувачкиот центар на националната студентска клириншка куќа, пренесува „Инсајдер“. Ова е најголем пад на запишани студенти во САД во последната деценија.

Според Даг Шапиро, директор на истражувачкиот центар, падот го покажува големото влијание на пандемијата врз студентите и факултетите годинава. Траењето на овој ефект ќе зависи од тоа колку од студентите ќе може да се вратат на факултет оваа есен.

Бројот на запишани студенти се намалил за 3,5%, или 603.000 студенти, во 2021 во однос на минатата пролет. На американските факултети оваа пролет се запишале 16,9 милиони студенти, во споредба со 17,5 милиони минатата пролет. Ова е најголемо намалување од пролетта во 2011. Втор најголем пад имало минатата есен, кога се запишале 2,5% помалку студенти.


На додипломски студии, падот изнесува 4,9% оваа пролет, додека на последипломски студии се запишале 4,6% повеќе студенти во однос на минатата пролет. Најпогодени биле Калифорнија, Њујорк, Мичиген и Илиноис и само во седум сојузни држави имало зголемување на бројот на запишани студенти оваа пролет. Минатата есен, бројот на бруцоши во САД се намалил за 16%.

Сето ова финансиски ги погодило универзитетите. Минатата година, „Харвард“ имал намалување на приходите за 138 милиони долари. Со намалувањето на случаите на ковид-19, многу американски факултети планираат повторно да дозволат физичко присуство на студентите.

Автор: Келси Вламис
Извор: Insider