Црквата „Свети Ѓорѓи“ од Курбиново претставува исклучителен примерок на културното наследство сочувано на територијата на нашата држава и ремек-дело на византиското сликарство во 12 век. Токму оваа црква, која со своите вредности претставува дел од светското наследство, треба да претставува репер за нашиот однос, почитување и грижа за нашето наследство.

Ова денеска го изјави министерот за култура Асаф Адеми на меѓународната конференција „Валоризација на црквата 'Свети Ѓорѓи'‚ во Курбиново од XII век како културно наследство од посебно значење на патеката за културно наследство во 2018 година“, во чии рамки е и церемонијата за Иницијативата „Факел на културното наследство“ во Република Македонија, во рамките на Европската година на културното наследство 2018 што ја организира Здружението за валоризација и промоција на културното наследство „Македонида“ од Скопје.
- Позитивната европска традиција што е поврзана со одредени заеднички вредности овозможува афирмација, но, исто така, бара работливост и преиспитување на ставот кон културното наследство, во смисла на тоа колку и како ние го вреднуваме и го цениме. Ова е посебно поради фактот оти културното наследство на која било земја со своите посебности и препознатливи карактеристики е интегрален дел на светското културно наследство што е сведоштво за креативноста на човештвото и затоа заштитата на културното наследство претставува нужност и морална обврска - рече Адеми.

Посочи оти одговорноста е огромна кога станува збор за наследството, посебно за идентитетските аспекти како инкорпоративни вредности на одредена заедница.



- „Свети Ѓорѓи“ од Курбиново е една малечка црква подигната во едно далечно село во Република Македонија што ќе ве восхити со фрескоживописот на екстериерот и на ентериерот што ќе го запаметите до крајот на животот. Фрескоживописот припаѓа на византискиот стил и се карактеризира со живи бои, со карактеристични претстави на лицата, со изрази на нивните лица, со сцени што се специфични и самиот тој факт доволно говори за значењето што овој монумент го има не само за македонската јавност, туку и за европската - посочи таа.

Втората активност во рамки на конференцијата, посочи Петрова-Митевска, е иницијативата на „Факел на културното наследство“ што ќе се одржи исто така денеска во Чифте амам.

- Оваа иницијатива е одлична можност да се промовира македонското културно и религиозно наследство, што во исто време е и европско наследство и припаѓа на европската база на цивилизациски корени во ЕУ - рече Петрова-Митевска.

Оваа иницијатива е меѓу водечките настани на европско ниво годинава и има цел да ја подигне свеста за значењето на богатото верско наследство на Европа. Република Македонија е единствената земја што не е членка на ЕУ каде што ќе се одржи церемонијата на доставување лични писма во т.н. „кутија на сеќавања“. Во рамките на церемонијата во Чифте амам ќе биде отворена и изложбата на фотографии „Свети места“.

Во фокус на конференцијата е црквата „Св. Ѓорѓи“ од Курбиново - нејзиното значење, конзервација, но и ревитализација во насока на развојот на верскиот туризам. Истата е финансиски поддржана од Делегацијата на ЕУ во Република Македонија во рамките на Европската година на културното наследство 2018.