На жителите на швајцарското село Митхолц им било кажано дека можеби ќе треба да ги напуштат своите домови на период од повеќе од една деценија поради чистење депонија на оружје од Втората светска војна која се наоѓа во близина на селото.

Во 1947 година од неочекувана експлозија во Митхолц починале деветмина и многу градби биле уништени. Во селото има 3.500 тони муниција останата од Втората светска војна. Министерството за одбрана на Швајцарија вели дека шансите за нова експлозија се потценети и дека ризикот за животот на жителите сега е неприфатлив.


Од министерството велат дека чистењето на депонијата се очекува да почне во 2031 година по напорни подготовки. Можеби ќе биде потребно и преместување на пат што поминува низ селото. Во тек се консултации со жителите и локалните бизниси кои треба да се изјаснат за своите понатамошни планови до 17 април.


На својата веб-страница швајцарското министерство за одбрана изјавува дека ќе им понуди поддршка на оние што ќе бидат принудени да се селат, но за тоа ќе бидат потребни разговори со семејствата. Доколку евакуацијата предизвика проблеми и не ги задоволи целите за заштита, можно е намалување на ризикот со покривање на местото со камен.


Околу местото во моментов има повеќе системи што ги мерат промените во температурата, испуштањето гас и движењето на карпите. Составен е и план за итно реагирање во случај на инцидент.

Извор: News.sky.com