Модерните тротоари се полни со иницијали и отпечатоци од раце што децата ги оставале во новиот цемент, но излегува дека со векови децата го правеле истото.
Археолозите пронашле античка плоча од мермер травертин во близина на Кесанг, Тибет. Објавувајќи ги своите наоди во списанието „Сајнс булетин“, тимот објавил дека можеби ја открил најстарата пештерска уметност во светот - серија навидум намерни отпечатоци од раце и стапалки оставени од две мали деца пред околу 200.000 години.
Откритието се состои од 10 праисториски отпечатоци - пет стапалки и пет дланки. Според големината на отпечатоците, тимот проценува дека тие им припаѓаат на 7-годишно и 12-годишно дете. Децата можеби биле неандерталци, хомо сапиенс (модерни луѓе) или денисовци (рани роднини на луѓе пронајдени во Азија во тоа време). Без оглед на нивниот вид, се чини дека децата одвоиле време да ги притиснат рацете во меката кал, која на крајот била фосилизирана.
Дали овие отпечатоци се најраниот пример за пештерска уметност што досега е откриен? Можеби. Тие датираат од пред 169.000 до 226.000 години во средината на плеистоценот. Ова ги прави три или четири пати постари од најстарите познати пештерски слики. Сепак, дали отпечатоците се намерно естетски? Коавторот на студијата, Томас Урбан, верува дека нивната јасна дефиниција и нивниот внимателен распоред укажуваат на намера.
- Очигледно е дека тие не се случајно поставени - вели тој.
Додека некои гледаат каприц од детството во отпечатоците, други се повеќе скептични за нивната категоризација како уметност.
- Мислам дека не постојат научни критериуми за да се докаже - тоа е прашање на вера и желба да се гледаат работите на еден или на друг начин - вели Едуардо Мајорал, палеонтолог кој не бил вклучен во студијата.
Извор:
Mymodernmet.com
Фото:
D.D. Zhang et al./Science Bulletin