Министерството за образование и наука - МОН формирало работна група која развива концепт за целосна и суштинска промена на наставните и дидактичките материјали за основно и средно образование.

- Потребата од воведување целосно нов систем за изработка на наставни материјали е резултат на постојаните реакции од јавноста, родителите/старателите, учениците, но и самите наставници за квалитетот на учебниците, долгите постапки за нивно одобрување, како и честите повлекувања на учебници поради стереотипи, предрасуди, грешки и недоследности - велат од МОН.

Работната група е составена од претставници од Министерството за образование и наука, Педагошката служба, Бирото за развој на образованието, како и претставници од меѓународни институции и граѓанскиот сектор.

- Групата веќе работи на анализа на најдобрите искуства и практики од неколку европски, скандинавски и земји од регионот, врз основа на која ќе се изготви целосно нов систем за унапредување на квалитетот на наставата кој подразбира не само употреба на учебници, туку и изработка и употреба на разни видови наставни и дидактички материјали за наставниците и учениците. Голем број земји во светот веќе го имаат надминато системот на класична употреба на учебник, поради што учениците своето знаење го стекнуваат преку различни извори на информации и разновидни дигитални алатки. Ова е идеја и на голем број наши наставници, но е дел и од препораките на ОЕЦД за системот на образование во нашата земја - информираат од МОН.

Реформата на учебниците ќе се прави во широка консултација, велат од Министерството, истовремено со реформите за основно образование, а планот е да се воведе од следната учебна година.