Составена од 53 најкарактеристични народни везови од различни етногеографски области на нашата земја, денеска во Музејот на Македонија ќе биде отворена изложбата „Навезени спомени“, поставена во чест на нашиот реномиран и меѓународно признат поет - Блаже Конески. Со отворањето на изложбата, Музејот дава свој придонес кон одбележувањето на 100-годишнината од раѓањето на втемелувачот на современата македонска филологија и лингвистика.
Везовите што се поставени во 30 рамки претставуваат значајно сведоштво за креативноста, оригиналноста и вештината на жената-везилка, но и за традицијата што со векови се пренесувала од колено на колено. Автор на изложбата и каталогот е кустос советник Горданче Видиниќ.
- Не бил случаен поривот на Блаже Конески да бара инспирација во македонскиот вез и да ја воспева македонската жена во песната „Везилка“. Везејќи, таа ги отсликувала културната меморија и колективниот идентитет на македонскиот народ - велат организаторите на изложбата.