Финска тврди дека е пред Велика Британија и поголемиот дел од светот кога станува збор за еколошката криза.
Новинарот Руби Харбор одлучи да се увери во тоа, па ги спакува куферите и се упати кон Хелсинки да открие нешто плус за Финска. Руби се сретна со политичари, бизнис-лидери и членови на јавноста за да открие каква акција за животната средина презема Финска. Еве што откри.
Хелсинки ќе испрати дрвен сателит во вселената
Да. Добро прочитавте. Дрвен сателит. „ВИСА Вудстат“ е наносателит дизајниран и создаден од УПМ, компанија која дизајнира технологија со мала или никаква употреба на фосилни горива. Првиот дрвен сателит во светот треба да биде лансиран оваа година. Направен е од иверица од бреза и ќе може да ги издржи и топлите и ниските температури на орбитата. Тежи само 1 кг овде на Земјата и има димензии 10см x 10см x 10см.
Даноците се високи и на Финците тоа не им пречи
Финска е дарежлива социјална држава. Големи суми од даноците се користат за подобрување на јавните објекти. Според тоа, квалитетот на животот е значително подобрен, што објаснува зошто на Финците не им пречи да плаќаат дополнителни даноци. Хелсиншката централна библиотека „Ооди“, дизајнирана од „АЛА архитектс“, обезбедува пристап до многу работи - од машини за шиење, 3Д-печатачи, соби за компјутерски игри до статистики. Овие даноци финансираат и прогресивни политики за животната средина.
Облеката се прави од памук направен од облека од втора рака
Сосема нова биобазирана текстилна компанија наречена „Инфинитед фајбер“ користи стара облека и материјали кои инаку би оделе на депонија за да создаде нова облека. Основана во 2016 година, биотехнолошката компанија веќе доби голем број следбеници, вклучувајќи ја и актерката од „Игра на тронови“, Мејси Вилијамс, која дизајнира парче со материјали од „бесконечно влакно“.
Имаат апарати за бањата направени од дрво кои се поцврсти од керамиката
„Вудио“ е бренд за екодизајн кој го користи првиот светски 100 отсто водоотпорен композитен материјал од цврсто дрво. Нивните производи се направени од иверка и смола. Иако смолата има мал јаглероден отпечаток, компанијата активно работи на нови смоли кои можат да се направат од целулоза. „Вудио“ нуди и кади, тоалети, мијалници и други додатоци, во различни тонови базирани на природата.
Иднината на медицината би можеле да бидат производи од дрво
Биомедицината во Финска станува поодржлива со научните истражувања за тоа како да се направат нештетни секојдневни производи. „Гроудекс“ е компанија која создава нефибриларен целулозен хидрогел за биомедицински цели. Еден пример е облога за рана за пациенти со изгореници или лузни која останува на кожата додека не зарасне раната. Овие производи се дизајнирани да бидат високо биокомпатибилни со човечките клетки и ткива и без животински или човечки деривати. Ова научно истражување е применливо за глобалните напори за намалување на емисиите на јаглерод.
По Уругвај, Финска е следната земја што ќе стане јаглеродно неутрална
Финска има поставено низа еколошки цели:
- Да постигне јаглеродна неутралност до 2035 година;
- Да биде првата земја во светот без фосили;
- Намалување на јаглеродниот отпечаток на градежништвото и домувањето;
- Запирање на падот на биолошката разновидност во Финска;
- Зајакнување на улогата на Финска како лидер во циркуларната економија.
Од 2029 година во Финска ќе биде забранета употребата на јаглен за енергија. Работата на фабриката за јаглен „Ханасаари“ во Хелсинки ќе престане во 2023 година и тоа ќе има значителни позитивни ефекти врз климата и значително ќе го намали јаглеродниот отпечаток на градот и земјата.
Природата е клучна за менталното здравје на Финците
Финците ѝ даваат приоритет на природата за нивното ментално здравје. Само два часа вежбање на отворено во природата го прават човекот посреќен. Финска има практика наречена „шумско капење“, што значи поминување време на отворено во природа. Тоа вклучува користење на сите ваши сетила за повторно поврзување со природната средина. „Дрво-јога“ е ефикасен начин за повторно поврзување на вашиот ум со сегашниот момент во шумата.