Во приватна градина во Португалија биле откриени остатоци од диносаурус кој би можел да биде најголемиот диносаурус откриен во Европа.

Фосилите биле откриени во градот Помбал во 2017 година, кога жител започнал градежни активности на неговата куќа.

Остатоците се од видот сауропод, кој бил најголемиот диносаурус што живеел на Земјата. Овие диносауруси имале долг врат и опашка, јаделе растенија и се движеле на четири нозе.


Овој месец палеонтолози од Португалија и од Шпанија ископале делови од 'рбетот и ребрата на диносаурусот, според кои било пресметано дека животното било високо околу 12 метри, а долго 25 метри. Се проценува дека коските се стари околу 150 милиони години.

Палеонтолозите што работат на ископувањето се надеваат дека имаат уште за откривање бидејќи скелетот е во релативно недопрена состојба.

Извор: BBC