Во Битола одржан првиот средношколски пленум

Денес во Битола се одржа првиот средношколски пленум под отворено небо, пред средното училиште СОЕУ „Јане Сандански“.

 

Иако средношколците поднеле барање до директорката на средното училиште, за да се ослободи една просторија за одржување на пленумот, сепак тие биле одбиени со изговор дека пленумот не е регистриран како формална организација.

На пленумот се дискутираше за проблемите во средното образование, и се отворија повеќе теми и суштински проблеми за самото образование. Како што велат студентите, барањата ќе бидат формулирани врз основа на проблемите од дискусијата и тоа во најкраток можен период.

На прашањето дали тие планираат бојкот на наставата, пленумот вели дека се`уште е рано да се дискутира на оваа тема.

Според пленумот, главниот проблем со којшто се соочуваат средношколците е тоа што сите реформи во образованието се во насока на зголемување на тестирањата, а со тоа се зголемува и притисокот којшто го чувствуваат средношколците. Згора на тоа, нитуедна реформа не допира до самиот образовен процес, туку целта се само крајните резултати.