Порака на тинејџер кој боледува од ретка болест: Имам само едно прашање до државниот врв

Ненад Павловиќ (16) од Нови Београд неделава објави видео на „YouTube“ кое само за неколку часа ја кренало цела Србија на нозе. Видеото го поттикнало и премиерот Александар Вучиќ да реагира на „Твитер“.

Имено, Ненад боледува од многу ретка болест на крвта, пароксизмална ноќна хемоглобинурија и за неа му е потребен исклучително скап лек. Постои само еден лек за ова заболување, а ретко може да си го дозволи секој, како што вели Ненад.

Поради тоа, тој одлучил да ѝ се обрати на јавноста. Она што неговата приказната ја прави различна од останатите е фактот дека тој не отвора жиро сметка и собира средства за лечење, но сака да му постави едно прашање на државниот врв.

- Мене не ми е цел да отворам жиро сметка со надеж дека луѓето ќе собираат пари, бидејќи тоа решение не е трајно. Мене ми е потребна достапност на лекот до крајот на животот. Во текот на изминатата година беа контактирани сите надлежни, но секако, до денешен ден сè е испреплетено и сржта е иста - нема парични средства. Затоа сакам да го прашам државниот врв дали тоа е вистина, дали нема пари за моето лечење и дали некој ќе преземе нешто. Бидејќи, како државјанин на Србија и под здравствено осигурување сметам дека е коректно да се лечам овде - вели Ненад во видеото.

За неколку часа, видеото направило бум на социјалните мрежи, а стигнало и до врвот на државата. Самиот премиер Вучиќ ветил дека ќе стори сè што може.