Средношколци ќе учат што значи професијата војник
Средношколците од неколку средни училишта од повеќе градови во земјава од денеска ќе имаат интерактивни предавања за условите за прием во службата на Армијата на Репубилика Македонија, како и придобивките од службата во армијата како дел од проектот за популаризација на воениот позив за служба во Армијата на Република Македонија
Проектот ќе трае до крајот на април, а предавањата ќе ги вршат претставници на Министерството за одбрана, заедно со професионални војници, подофицери и офицери на АРМ.
- Тимовите составени од професионалци, вработени во Министерството, како и припадниците на Армијата детално ќе ги информираат средношколците за условите за прием во служба на АРМ, нивните обврски, како и големиот број придобивки од службата во АРМ. На интерактивните кратки предавања, средношколците ќе имаат можност да се информираат за сето она што нив ги интересира од областа на професијата – војник. Основната цел на проектот е запознавање на младите лица во Македонија со војничката професија, како и зголемување на нивниот интерес за, најпрво, служење на доброволен воен рок, а потоа и пријавување на огласите за професионални војници и за офицери во АРМ. Со зголемување на бројот на пријавени лица на овие огласи се одржува и зголемува и квалитетот на изборот на идните припадници на Армијата - велат од министерството за одбрана.
Инаку предавањата започнуваат во средните училишта „Јовче Тесличков“ и „Димитрија Чуповски“ од Велес, „Ристе Ристески – Ричко“ од Прилеп, скопската гимназија „Јосип Броз – Тито“, „Гостивар“ од Гостивар, “Јане Сандански“ од Струмица и штипските средни училишта„Сергеј Михајлов“ и „Коле Нехтенин“.