Повеќе практична настава бараат студенти од Педагошки факултет

Повеќе практична настава во училишта, професорите да бидат присутни на закажаните термини за консултации, се само дел од промените кои ги бараат студенти од Педагошкиот факултет „Св. Климент Охридски“, а кои ќе донесат подобар наставен кадар.



Студентите ги анкетиравме на факултетот, каде се организираше првиот поетски студентски фестивал во чест на браќата Кирил и Методиј. Тие велат дека поребна е подобра организираност во комуникација со студентските прашања, но најпотребно им е квалитетна практична настава. Учениците од прво до четврто одделение се преоптоварени со материјал, смета студентка која одела на пракса во училиште.

- Сакам праксата која ја имаме во училиштата да трае половина година, а не еден месец, така ќе бидам подготвена за работа после завршувањето на студиите – вели една студентка.

Нејзина студентка смета дека се потребни промени и во наставните програми.

- Пренатрупани сме со часови по теорија - вели таа.

Професорот Мите Спасевски, кој предава на овој факултет објаснува дека на високото образование потребна му е долична поставеност во рамки на севкупните процеси и системи, бидејќи претставува значаен сегмент во општеството.

- Студентите сакаат да пишуваат, но им треба поддршка, артикулирање, им треба создавање на творечки амбиент, им треба простор, а ние во тој дух се обидуваме во творечкиот крвоток да ја инсталираме нашата поддршка на студентите, да ги здружиме - ни изјави Спасевски.

Професорката Елизабета Бандиловска рече дека младите кријат огромен творечки потенцијал во себе кој останал на маргините, па неопходно е професорите да ги поттикат.

Педагошки факултет организираше прв поетски студентски фестивал на кој со свои книжевни творби учествуваа студенти од десетина факултети, а во чест на големото просветителско дело на браќата Кирил и Методиј. На настанот промовиран беше и литературен алманах „На крилјата на зборот“, во кој објавена е песната под наслов „Среќа”, на студентката Елена Спировска. Таа е горда што нејзината песна е дел од изданието.

- Гордост ми е што со песна сум дел од овој алманах каде учествуваат мал број на студенти. Прва година сум на Педагошки факултет, насока библиотекарство. Има само десеттина студенти на оваа насока, а е нешто што треба да се цени, почитува- вели Спировска.

Од факултетот планираат ваков фестивал да организираат и идната година по повод 24 Мај и да промовираат нов алманах, како и да се доделуваат награди за најдобрите творби.