Јупитер како на дланка: Џуно ги испрати најубавите фотографии досега

Малото вселенско летало при поминувањето покрај Јупитер пред неколку дена ги сними досега најубавите фотографии од „Големата црвена дамка“, џиновска бура поголема од Земјата, која на Јупитер дивее со векови.

Најбрзото летало што досега е лансирано во вселената пред неколку дена се впушти во најблискиот лет околу Јупитер, на само 9.000 километри над „Црвената дамка“ – едно од најголемите обележја на оваа џиновска планета.

Камерите на Џуно се фокусираа на оваа огромна бура и цели девет минути снимаа фотографии од оваа појава, а според квалитетот, тие се најдобрите испратени од ова вселенско летало.


Џуно ги сними овие фотографии во своето седмо проаѓање покрај Јупитер. Леталото, кое се движи со брзина од 210.000 километри на час, на секои 53,5 дена поминува над Јупитер, и затоа беше толку голем предизвикот да се снимат вакви детални фотографии. Но, Џуно сепак успеа во тоа и ги испрати досега најпрецизните фотографии од бури на некоја друга планета. Ова е огромен напредок во однос на првата фотографија што во 19 век беше снимена од Земјата.

НАСА во средата ги објави првите „суровини“ со јавен повик до сите компетентни лица да ги симнат фотографиите за натамошна обработка, која би можела уште подетално да ги прикаже појавите и активностите на Јупитер.


Научниците се надеваат дека мисијата на Џуно ќе помогне во откривањето на дополнителните тајни на „Големата црвена дамка“: какви сили ја покренуваат таквата планетарна бура, колку долго постои, колку длабоко ги зафаќа пониските делови од атмосферата на Јупитер и зошто се чини дека постапно исчезнува.

Астрономите исто така се надеваат дека подоброто разбирање на „Големата црвена дамка“ би можело да фрли ново светло врз прашањата за структурата, механиката и формирањето на самиот Јупитер.